تون جو تبديل ٿيندو وڃي ٿو پرين.
درد قنديل ٿيندو وڃي ٿو پرين.
گهاوَ منهنجا گلابن جيان ٿا ٽڙن،
سور رابيل ٿيندو وڃي ٿو پرين.
تو چيو سونهن تي لک سدائين غزل،
حڪم تعميل ٿيندو وڃي ٿو پرين.
وار کولي نه گهم سمنڊ تي شام جو،
شام سان ويل ٿيندو وڃي ٿو پرين.
نيڻ نيڻن ۾ ۽ خواب کوليءَ ۾ بند،
ديد ۾ جيل ٿيندو وڃي ٿو پرين.
منهنجو هر لڙڪ دامن ۾ مجرم جيان،
اڄ به تحويل ٿيندو وڃي ٿو پرين.
مختصر زندگي ۽ وڇوڙو ڊگهو،
ساهه تڪميل ٿيندو وڃي ٿو پرين.
منهنجي جيون ۾، شعرن ۾ سچ ٿو چوان،
درد تحليل ٿيندو وڃي ٿو پرين.