تو بي وفا کان ننڍڙو هي ڪم نه ٿي سگهيو.
ڪوڙو به واعدو هڪ، ڪنهن دم نه ٿي سگهيو.
هو ڏس وڃي ملي ٿو ڌرتيءَ کي آسمان،
افسوس يار پنهنجو سنگم نه ٿي سگهيو.
هر مرض جو علاج ڪري وقت ٿو مگر،
منهنجي ڦٽن لئه وقت به مرهم نه ٿي سگهيو.
بگڙيو ئي ڪجهه عجيب طرح سان هيو نصيب،
مرڪڻ جي باوجود به گهٽ غم نه ٿي سگهيو.
ٻارهو ئي زندگيءَ تي حاوي رهي خزان،
هڪڙو به پل خوشيءَ جو ڇو ضم نه ٿي سگهيو.
تنهنجي الڳ رهڻ جي، ٿي تڙپ کي سڪون،
توڙي زهر به موت جو، پيتم نه ٿي سگهيو.