خيال هن جي انگ تي بيهي رهيو.
ساهه منهنجو ڌنگ تي بيهي رهيو.
ڇا به ٿي پر، هي پرين حاصل ڪبو،
ضد هڪڙي ٽنگ تي بيهي رهيو.
ٿي زماني جي خفن کان بي خبر،
هڪ مصور رنگ تي بيهي رهيو.
عشق مون کي خوب خاموشي ڏني،
چاهه تنهنجو چنگ تي بيهي رهيو.
سوچ ۾ پئجي ويو ڪڙمي ڏٺم،
صبح هڪڙي سنگ تي بيهي رهيو.
هن صدا ڏئي هن سخي کان ڇا گهريو؟
ڇو سخي اڄ منگ تي بيهي رهيو.
درد قابو تو ائين مرڪي ڪيو،
مال ڄڻ ڪو ونگ تي بيهي رهيو.
مون ڏٺو شهمير ساڀيا کي ڇڏي،
خواب جي آ جهنگ تي بيهي رهيو.