سٺن تي خرابن ڇڏيو قرض چاڙهي.
چپن تي نقابن ڇڏيو قرض چاڙهي.
اوجاڳي جو ننڊ ساڻ ناتو ڇا جڙيو،
اکين تي به خوابن ڇڏيو قرض چاڙهي.
وياجي جفائن ۾ جيون اڙيل آ،
اڃا ڀي عذابن ڇڏيو قرض چاڙهي.
الئه ڇو انهن کي پڙهي ڪو نه سگهيس،
ڪٻٽ جي ڪتابن ڇڏيو قرض چاڙهي.
تقاضا اها آ توهان پاڻ لاهيو،
توهان تي حجابن ڇڏيو قرض چاڙهي.
سوالن ۾ سالن کان الجهيل هئس مان،
گهڙيءَ ۾ جوابن ڇڏيو قرض چاڙهي.
مسلسل گناهن جي گهيري ۾ آهيان،
سدائين ثوابن ڇڏيو قرض چاڙهي.
محبت جي خاطر بنا مند ٽڙي پيا،
خزان تي گلابن ڇڏيو قرض چاڙهي.