(6)
اَنگهَن اَڙيو اَنگُ،
ساري سانوَلَ سَنگُ، وو!
هڪ هڪ پَل آ ساههَ کي، ڄڻ واسينگن وَنگُ؛
اَنگهَن اَڙيو اَنگ!
هانءُ به اَرتو آهه، ڙي! رُوءَ ته ريٽو رَنگُ؛
اَنگهَن اَڙيو اَنگُ!
سُر سُر اوتي آڳَ جو، چِينئَن تي ڄڻ چَنگُ؛
اَنگهَن اَڙيو اَنگُ!
آ جي ساههُ سَرِيرَ ۾، دردن ناهي دَنگُ؛
اَنگهَن اَڙيو اَنگُ!
پل پل سوچُنِ چُلهه تي، مَنُ ڄڻ ڪو آونگُ ؛
اَنگهَن اَڙيو اَنگُ!
ڦَٿِڪي هَڏَن، ماسَ مَنجهِه، ساهُه سمورو تَنگُ؛
اَنگهَن اَڙيو اَنگُ!
اَجَلَ کان اَرڏو ڪَکي، جُدائيءَ جو ڏَنگُ؛
اَنگهَن اَڙيو اَنگُ!