ڇا جي آ آلاڻ
اکين ۾ ڇا جي آ آلاڻ
پنڇي، پنک وڃائي ويٺين
ڇا ته وڃايئي هاڻ
ڪڪريون ڪڙڪيون، وَرکا وَرسِي
سارين گنگا ڪنڌيءَ تَرسي
سنڌوءَ جي آراڻ
اکين ۾ ڇا جي آ آلاڻ
سِج جنءَ اُلَٿو، ٿي انڌاري
ڀونءِ سموري ڪاري ڪاري
اُڀّ ته ڏيئڙن کاڻ
اکين ۾ ڇا جي آ آلاڻ
هاڻي هت ناهي ڪوهياري
ڪنهن لئه آ تو سگري ٻاري
ڪِنجهين ڪنهنجي ڪاڻ
اکين ۾ ڇا جي آ آلاڻ
رُڃّ نچي ٿي رڻ ۾، بر ۾
باهيون تن ۾، اُڃّ اندر ۾
پر ڏِس، ناهين ٻاڻ
اکين ۾ ڇا جي آ آلاڻ
ڇا جي آ آلاڻ
اکين ۾ ڇا جي آ آلاڻ
پنڇي، پنک وڃائي ويٺين
ڇا ته وڃايئي هاڻ