پروهتو، پروهتو
الا، سُڄاڻ پروهتو
نه وينتي، سوال ڪو
اِڇا، نه سَڌّ، چاهِنا
گمان سڀ ختم ڪري
خيال سڀ دفن ڪري
اچو، بهو، نه سوچجو
نه چورجو زبان بي زبان کي
ڏسو، ڏسو
مجسمو چُري پَيو
الا، الا، سُري پَيو
نه ڪنهن به ڇيڙ ڪئي اٿس
نه ڪنهن به کيس آ ٿڏيو
چُري چُري پَيو سُري
سُري سُري پَيو چُري
ٿڙي پَيو اڳنڌ مرمريءَ مٿي
ائين لڳي: نچي پَيو
ڪُماچُ ٿي ٻُري پَيو
ڏِياچ وانگ ڪنڌ تي ترار ڄڻ جهلي پَيو
جهُري پَيو
جهُري جهُري ڦري پَيو
ڦري ڦري جهُري پَيو
اجهو ڪريو ٽڙڪ ڪري
اڳنڌ مرمري سڄو ذرا ذرا هِتي هُتي
پروهتو، پروهتو
الا، سڄاڻ پروهتو
نه وينتي، سوال ڪو
اِڇا، نه سَڌّ، چاهِنا
گمان سڀ ختم ڪري
خيال سڀ دفن ڪري
اچو، بهو، نه سوچجو
نه چورجو زبان بي زبان کي
ڏسو، ڏسو
مجسمو چُري پَيو
مجسمو چُري پَيو