مشهد مقدس
مشهد مقدس ايران جو ٻيو نمبر وڏو شهر آهي ۽ رضوي خراسان صوبي جي گاديءَ جو هنڌ آهي. هي شهر ايران جي اتر اوڀر ۾ واقع آهي. سندس حدون ترڪمنستان ۽ افغانستان سان ملن ٿيون. 1997ع ۾ هن شهر جي آبادي لڳ ڀڳ وِيهَه ٻاويهه لک کن آهي. هي تمام عزت ۽ توقير وارو شهر آهي، ڇو ته منجهس سلسله اثنا عشريه جي اٺين امام حضرت علي رضاؑ جو مدفن ۽ حرم مبارڪ آهي. هن شهر جي موسم اونهاري ۾ معتدل ۽ سياري ۾ سرد آهي. سڄو شهر خوبصورت عمارتن ۽ صاف سٿرن روڊ رستن ۽ گل و گلڪاريءَ جي ڪري ڏاڍو ديده زيب آهي. سن 1333ع ۾ مشهور سياح ابن بطو طه جڏهن هي شهر ڏٺو ته ان به اهو چئي ڏنو ته، ”هي هڪ خوبصورت ۽ وڏو شهر آهي، جنهن جي رستي تي ميويدار وڻ آهن ۽ آسپاس واهه ۽ نهرون وهن ٿيون. وچ ۾ هڪ وڏو گنبذ آهي، جنهن ۾ شيعه اثنا عشري سلسلي جي اٺين امام جو مدفن آهي، جنهن جي روزانه هزارين زائرين حاضري ڀرين ٿا.“
هن شهر تيموري شهزادي شاهه رخ مرزا جي زماني ۾ وڏي ترقي ڪئي ۽ مشهد هن خطي جو هڪ مکيه شهر ۽ ڪاروباري مرڪز بڻيو. سندس گهر واري گوهر شاد امام جي حرم سان ملحقه هڪ شاهي مسجد سن 1418ع ۾ پنهنجي نالي سان جوڙائي، جيڪا اڄ ڏينهن تائين ديده زيب خوبصورت ۽ فن تعمير جو اعليٰ مثال آهي. بهرحال مشهد به ٻين شهرن وانگر تاريخ جا ڪيئي لاها چاڙها ڏٺا ۽ اڄ جو مشهد دنيا جي بهترين شهرن مان هڪ آهي ۽ منهنجو ايترو پسنديده شهر آهي، ته جيڪڏهن حالات اجازت ڏين ته مان مشهد کي پنهنجو مسڪن بڻايان. مشهد موٽر وي وسيلي ايران جي تمام وڏن شهرن سان ڳنڍيل آهي، جتي بهترين وولو، مرسڊيز ۽ ڪيترن ئي قسمن جون آرامده بسون ڏينهن رات مسافرن کي مشهد ڏانهن ۽ مشهد کان واپس وٺيو ٿيون وڃن. مشهد ۾ ايئرپورٽ پڻ آهي، جتان پندرهن پندرهن منٽن ۾ مختلف شهرن ڏانهن فلائيٽون روان دوان آهن. مشهد راهه آهن يعني ٽرين وسيلي تهران ۽ مختلف شهرن سان ڳنڍيل آهي. مون کي 2010 ۾ قطارنور ۾ مشهد کان تهران وڃڻ جو موقعو مليو. مشهد مان ٽرين پوري وقت تي هَلي ۽ پوري وقت تي تهران ۾ ڇڏيائين. ٽرين ڪيتري آرامده ۽ سٺي هئي ان جو ذڪر ڪنهن ٻئي دفعي ڪبو. بهرڪيف مشهد هر لحاظ کان هڪ قابل تعريف شهر آهي. هن شهر جون بازاريون، روڊ رستا ڪشاده آهن. ايراني آٽوموبيل انڊسٽريءَ ۾ به هي شهر هڪ اعليٰ مقام رکي ٿو.