ٽڙي پئي آ، ٽاري، ٽاري،
ڦوڳن ۾ ڪيئن سرنهن ڦلاري.
مس اروڙ کان ڊئم ٺهيو آ،
ٿر ٿيو آ گل گلزاري.
مون سان گڏجي کيڏ بلا شاهه،
بازي جيتڻ، هارڻ واري.
جيسين بکئي جو پيٽ نه ڀربو،
جنگ اسان جي رهندي جاري.
ڪعبو قبلو ويٺو وساري،
گهاري ۾ جنهن رات گذاري.
منهنجي مالها، منهنجا مڻڪا،
سنڌي، سنڌيت، سنڌ سونهاري.
لاش به مائرن کي نه ملن ٿا،
ڪنهن نه اڳي هيئن سنڌ ٻُهاري.
ها، پر تن کي کولي ٻڌايو،
ويڙهه آ لڳڻي وڏڙن واري.
سنڌ جو شان سلامت رهندو،
چار ڏهاڙا آهن چاري.