واٽ ٺهندي رهي
هر نئين موڙ تان ڌوڙ اُڏندي رهي
واٽ ٺهندي رهي.
فاصلا ٿا وڌن، قافلا روڪيو،
گھاٽي وڻ جو ڏندڻ ڪو هِت ته پوکيو،
هر مسافر کي جئن ڇانوَ ملندي رهي-
واٽ ٺهندي رهي.
ڪانهن جي ڪِلڪ جو قلم ٿڪبو ڪٿي!
ويِر بيهي رهي، وقت رڪبو ڪٿي!
هر ظلم جي ڀلي رات وڌندي رهي-
واٽ ٺهندي رهي.
ذهن روشن رهي، هٿ تيشا ڪريو،
خون ٻارڻ سهي، پير ڦيٿا ڪريو،
وک طوفان جيان تيز کڄندي رهي-
واٽ ٺهندي رهي.
حوصلو هر گھڙيءَ پيو اجالا ڪڍي،
آس اوندهه ۾ پئي تيز شعلا ڪڍي،
سرخ چهرن منجھان باک ڦٽندي رهي-
واٽ ٺهندي رهي.
رات جي سينڌ ۾ چنڊ چمڪيو ته ڇا،
ڪو ڏيو ٻاٽ اوندهه ۾ ٽمڪيو ته ڇا،
سچ ۽ سونهن جي جوت جلندي رهي-
واٽ ٺهندي رهي.
خون ٽچڪي پيو، پير ڦٽجي پون،
گرم واريءَ ڀل لڱ لٽجي وڃن،
رت صحرا جي آويءَ پچندي رهي-
واٽ ٺهندي رهي.