شخصيتون ۽ خاڪا

صادق فقير توکان ٿيندي ڌار

ڪتاب ”صادق فقير توکان ٿيندي ڌار“ اوهان اڳيان پيش ڪجي ٿو. هن ڪتاب جو مرتب ليکڪ ۽ محقق اسحاق سميجو صاحب آهي. سنڌ جي ٻاٻيهي، آواز جي دنيا جي نرالي نانءُ صادق فقير بابت بهار جي ڀَريءَ مُند ۾، هڪ ڀلاري ديس تان هن جي حادثاتي موت جي نڀاڳي خبر آئي هئي، ۽ هزارين حسرت جي موتين ۽ گلابن آپگهات ڪري ڇڏيو هو. هن ڪتاب ۾ اسحاق سميجي صادق فقير بابت لکيل مضمونن، تاثرن، تعزيتي نوٽ بوڪ، سندس زندگي بابت خاڪن، سندس وڇوڙي تي شاعرن جي منظوم ڀيٽا کي ڪتابي شڪل ۾ سهيڙي پيش ڪيو آهي.
Title Cover of book صادق فقير توکان ٿيندي ڌار

وائي : بخشل باغي

سُڏڪي پيو سنگيت،
’گڊيءَ‘ تي غم جي گھٽا!
’مِٺيءَ‘ جو محبُوب تون
ڪارُونجھر جو گيت،
’گڊيءَ‘ تي غم جي گھٽا!
ڪيڏاري جو رُوپ ٿيا
هي سڀ تنهنجا ميت،
’گڊيءَ‘ تي غم جي گھٽا!
مِٽيءَ سان منسُوب ٿي
راڳي! تنهنجي ريت،
’گڊيءَ‘ تي غم جي گھٽا!
واريءَ واويلا وڏي
ڀِٽن توسان پريت،
’گڊيءَ‘ تي غم جي گھٽا!
ٿر جا ٿاڪ اُٻاڻڪا
مندر، مور، مَسيت،
’گڊيءَ‘ تي غم جي گھٽا!
تنهنجو وڇوڙو ميان!
جهڙي وِھُ جي ڳيت،
’گڊيءَ‘ تي غم جي گھٽا!