کلندي کلندي روئي پياسين! : ارباب احسان
ڳلڙا چُمندي روئي پياسين.
خاموش گهٽائن ۾ سورج،
بادل وانگي چوئي پياسين.
تو کي بند تابوت ۾ ڏسندي،
ٽھڪن ساڻ روئي پياسين.
تون آزاد فضا جو پنڇي،
ڪپيل ڏسي پر روئي پياسين.
موکيءَ ساڻ متارا گڏجي،
شاه عقيق به روئي پياسين.
ڪينجهر، منڇر ۽ ڪارونجهر،
ڪاڪ محل تي روئي پياسين.
دودا، جوڌا جوڳيءَ سُوڌا،
ڍاٽي ڍول به روئي پياسين.
ڪڏهن نه آيو آب اکين ۾،
گهوڙا گهوڙا روئي پياسين.
احسان اوجاڳيل اکڙين سان،
ماٽي پاڻ به روئي پياسين.