يار ايئن وڃبو نه آ : سائل پيرزادو
ساٿ ايئن ڇڏبو نه آ،
يار ايئن وڃبو نه آ!
ديس کان ٿي دُور ايڏو يار پوءِ،
سِڪَ جو ڏئي سُور هيڏو يار پوءِ،
ننڊ ۾ سُمهبو نه آ،
يار ايئن وڃبو نه آ!
ڳاءِ راڳي سِٽَ ٿي توکي سَڏي،
هُو گڊيءَ جي ڀِٽَ ٿي توکي سَڏي،
ڪنهن چيو وَربو نه آ؟
يار ايئن وڃبو نه آ!
موٽ ساوڻ مينهن ٿو توکي سَڏي،
۽ مٺيءَ جو نينهن ٿو توکي سَڏي،
پيار ۾ رُسبو نه آ،
يار ايئن وڃبو نه آ!
راڳڻيون خاموش ٿي ويون تو پُڄاڻا،
ڪويلون بي هوش ٿي ويون تو پُڄاڻا،
تارَ جان ٽُٽِبو نه آ!
يار ايئن وڃبو نه آ!