پيار منهنجي کي سمجهي سگهي آن نه تون- مون سان ڪوڙي محبت جون ڳالهيون نه ڪر،
عشق اوکو اٿئي، چنڊ دوکو اٿئي، چنڊ سان ويهي چاهت جون ڳالهيون نه ڪر.
هن حياتيءَ جي ٿڌڪار کان تون پري- ڇو رهڻ ٿي گهُرين پيار کان تون پري،
پريت جي ريت ۾ ٿي ملي هر خوشي- رڻ ۾ ويهي تون راحت جون ڳالهيون نه ڪر.
محل دولت سان ٺاهي ٿا سگهجن سوين- جاءِ ڪنهن دل ۾ ٺاهڻ آ ڏاڍي ڏکي،
قرب ۾ ڪنڌ منهنجو آ حاضر مگر- ڪنهن به فرعوني طاقت جون ڳالهيون نه ڪر.
روح رشتا ڀلي جيءُ جهيري ڇڏن- ڪنڌ ڪاٽن ڀلي سَنڌَ چيري ڇڏن،
دوستيءَ ۾ سڀئي درد جهوليءَ جهلي- عاشقيءَ ۾ عداوت جون ڳالهيون نه ڪر.
پاڪ جذبن تي هر روز پٿراءُ آ- دل جي هر آس ۾ گهاو تي گهاوءَ آ،
نااهل سان جي زاهد نڀائڻ گهرين- زهر پي وڃ شڪايت جون ڳالهيون نه ڪر.