ھمسفرو!
ھوشيار ھلو،
اي ھمسفرو!
ماحول ڀيانڪ ٿو ڏسجي،
ڪٿ راھ جا خطرا آھٽ تي جاڳي نه پون!
اي ھمسفرو!
چپ چاپ ھلو.
خاموش! ذرا ھوشياريءِ سان!
اڄ رات ڪٺن آئي آھي،
ھي راھگذر منزل جي سفر ۾ سڀني کان دشوار گذر آئي آھي!
ھلندا ته ھلو، اي ھمسفرو!
اڄ رات اچانڪ پئجي ويئي،
ان دشتِ مصائب ۾ پھچي،
جو دشتِ مصائب ٻڌجي ٿو بيرحم درندن جو مسڪن:
جنھن جھنگل ۾،
ھن کان اڳ ۾،
ڪئين قافلا ڦرجي لٽجي ويا،
۽ ڪيئي مسافر، پنھنجو متاع و مال لٽيرن کي بخشي،
ھن جھنگل جي خنزيرن جي خوراڪ بنيا!
اي ھمسفرو!
ھڪٻئي کي سنڀاليندي گذرو!
رستي جي ڪنارن ۾ ئي ھتي،
اونداھن گھرن غارن ۾،
ڪئين لُنڊيون، ٽَڪلا، ڳوراھيون
ھڻ کڻ ۽ ھزارين ازدھائون،
ڪئين نانگ وڇون،
خوراڪ جي لئه، چالاڪ بڻيا، ڦڻ ڦھلائي گھمندا ھوندا!
چپ چاپ ھلو
ھن جھنگل جي پُر ھول وڻن جي پاڇولن ۾ ڀوت آھن!
خاموش ھوا کي ڪن آھن:
جاڳي نه پون پاڇولن جا خونخوار بگھڙ،
ڀڙڪي نه اٿن، تاريڪ فضائن جي گَھِرَن غارن جي اندر
پوشيده نظر بگھڙن جي نگاھن جا شعلا!
ھوشياريءِ سان
اي ھمسفرو!
ھن جھنگل ۾ چيتا ۽ ببر ۽ ڳوڙپٽون،
۽ بُجِر رڇن جا ٽولا،
۽ سوئر ٽولن جا ٽولا،
ھر وقت شڪارن جي پويان،
ڦرندا ئي وتن ٿا چڪر ۾!
ھلندا ته ھلو، اي ھمسفرو!
اڄ رات ڪٺن آئي آھي،
ھوشيار رھو ۽ دم سانڍي، ھلندا ئي ھلو. . ..
ليڪن ھي ڇا؟
ڪجھه ساھ جي تيزيءَ جي ھلڪا آواز ڪنن کان گذرن ٿا،
۽ قدمن جي آھٽ به قريب ئي ٻڌجي ٿي،
شايد ڪي رھزن موقعي جي ڳولا ۾ ڊوڙون ٿا پائن،
ھيِءَ راھزنن، نانگن ۽ مِرُن، پُر خوف انڌيرن جي دنيا؟
ڀلجان ته نٿو، اي ھمسفرو!
ھا ياد آيو:
ھا ھا، ھي اھو ئي رڻ آھي!
خوش ٿيو ۽ مبارڪ ملھايو!
ان دشتِ مصائب مان ئي ھينئر گذرون ٿا اسين،
جنھن جي پويان،
ٿورائي قدم،
منزل جي سندر ديويءَ جو اسٿان آھي
جت شوخ، حسين، شفاف بدن ڪنيائون
سفيد ۽ صاف لباسن ۾، ھر دم،
مصروفِ تبسم ۽ رقصان،
شيدائي بنيون،
منزل جي ويرين کي ٿيون سڏن!
ڪجھه ٻُڌجي ٿو، اي ھمراھيو؟
ڪن لائي ٻڌو:
منزل جي مندر جي گھنڊ جو آواز ٻڌو ٿا، اي ساٿيو؟
بس، چند قدم منزل آھي!
اڳتي ئي ھلي منزل ٿيندي!
ھلندا ئي ھلو، وڌندا ئي ھلو،
تاريڪ فضائن جا سينا ھمت جي چراغن سان چيري،
وڌندا ئي ھلو!
ڪجھه عزم سفر کي تيز ڪريو:
ھيءَ رات اجھا گذري ويندي،
۽ صبح جي ظاھر ٿيندي ئي منزل جي پڄاڻي ٿي ويندي!
اي ھمسفرو،
بس جاڳ رکي،
ھوشياريءَ سان،
ھلندا ئي ھلو:
ھڪ ٻئي کي سنڀاليندي گذرو!
بس چند قدم،
بس چند قدم منزل آھي!
ھلندا ئي ھلو،
ھلندا ئي ھلو،
اي ھمسفرو!