لوڪ ادب، لساني ۽ ادبي تحقيق

دنيا جون شاعر عورتون

هن ڪتاب ۾ اڍائي ٽن هزار سالن جي عرصي تي ڦهليل عورتن جي پيڙائن جي تاريخ آهي. هن ۾ عيسوي سن کان به اڳي جي شاعرائن کان وٺي ويهين صديءَ جي پڇاڙي تائين، يونان جي سيفوءَ کان وٺي هندستان جي امرتا پريتم تائين وڃي شاعرائن جي خيالن، جذبن ۽ احساسن ۾ هڪجهڙائي حيرت ۾ وجهندڙ آهي.
Title Cover of book دنيا جون شاعر عورتون

ايملي برانتي :انگلينڊ (١٨١٨ع کان ١٨٤٨ع)

ايملي برانتي ڏاڍي خاموش زندگي گذاري، ھوءَ يارڪشائر ۾ رھندي ھئي. سندس گھر جي ويجھو ھڪ قبرستان ھو، جنهن جي چوڌاري وڏو خالي ميدان ھو، جنهن جي خاموشي ۽ پراسراريت ھن جي تخيل تي اثر انداز ٿي ۽ ھن صوفياڻي شاعري ڪئي ۽ سندس شاھڪار ناول”ودرنگ ھائيٽس“ لکڻ جو ماحول پيدا ڪيو.

[b]اوسيئڙو
[/b]
گھر خاموش آھي، سڀ ستل آھن
برف سان ويڙھيل وادين ۾
ھر طرف بس بادل آھن
جي ھوا کان ڊڄي ڊوڙن ٿا
۽ واچوڙن سان وکري وڃن ٿا
۽ ھوا سان وڻ ٽڙڪن ٿا

پنهنجي پناھھ گاھھ ۾ خوش ھرڪو
فرش تي وڇايل نرم گرم غاليچو
در درين مان ھوا ڪانه ٿي اچي
ننڍڙو ڏيئو پڻ پيو ٽمڪي
ان سان پاڇا لرزن ٿا
آءٌ وٽ کي سوريان ٿي
جيئن صبح جي تاري وانگي
مسافرن کي ڏيئو راھھ ڏسي
ھوا جي جھوٽي وانگي
ھو ايندو، منهنجو پيارو
سندر سھڻو ۽ سگھارو
ھو مون سان پيار ڪري ٿو
پر اکر به ڪنهن سان ڪين سلي ٿو
ھو ڪنهن کان ڦاسڻ جو ناھي
ھن حياتيءَ ۾ ڪيئن سگھندس
ھن جا ھزارين ٿورا لاھي.
اي ننڍڙا ڏيئا، ٻرندو رھجان
جيئن روشني پکڙي چوڏس
شش – ڪو کنڀ لڏي ٿو
ڀانيان ٿي ھوا جو جھوٽو ھو
ھو جنهن جي راھھ نهاريان
شايد اھو ئي اچي ٿو
اي پراسرار قوت – تنهنجي سگھھ واھھ واهه
توکي به شابس ھجي اي منهنجي وفا!
***