ايلس لسڪر شلر : جرمني (١٨٦٩ع کان ١٩٤٥ع)
وطن جي ياد
آءٌ نٿي ڄاڻان ۽ سڃاڻان
ھن ڌارئين ديس جي ڌارين ٻولي
ان جو لھجو منهنجو پنهنجو ناھي،
آڪاس ۾ رلندڙ بادلن کي
ڇا چوان – نٿي ڄاڻان
ھتان جي رات لڳي ماٽيلي ماءُ جيان
فرعون جي ھنن ٻيلن ۾ گھمندي سوچيندي
وطن جي تارن جي تصور کي ٿي چمان
منهنجا چپ چمڪي ٿا پون ھت
ان ڏورانهين ڏيھھ جي ٻولـِي ٻولي
اي منهنجي ڌرتي، تنهنجي ھنج ۾ مان
ڄڻ ڪو تصويرن جو ڪتاب ھجان
پر تنهنجي سھڻي چھري جي اڳيان
منهنجا لڙڪ پردو وجھي ٿا ڇڏين،
منهنجي سھڻن پکين جا پر ڪٽجي ويا آھن
باغ جي وڻن ۾ آکيرا پٿر بڻجي ويا آھن
منهنجن اباڻن جي قبرن جي ڪنهن بي حرمتي ڪئي آ
سندن دعائون پوتر نديءَ ۾ لڙھي ويون آھن!