دلبري تنهنجي بلي ڇا ڇا ڪيم،
دل لڳي تنهنجي بلي ڇا ڇا ڪيم،
درد جا دامن ڀرياسين کوڙ کوڙ،
اي خوشي تنهنجي بلي ڇا ڇا ڪيم،
ڪيترو سهڪائي مارين ٿي مگر،
زندگي تنهنجي بلي ڇا ڇا ڪيم،
ها اسان جو عشق آ، اکرن سندو،
شاعري تنهنجي بلي ڇا ڇا ڪيم،
ڪيترو ڌوڪو ڏنو اونداهين،
روشني تنهنجي بلي ڇا ڇا ڪيم،
سارو رت ۽ ست ڏئي تو کي ڇڏيم،
عاشقي تنهنجي بلي ڇا ڇا ڪيم،
هر قدم تي گهاءُ ئي تو کان مليا،
دوستي تنهنجي بلي ڇا ڇا ڪيم،
ڪيڏو ”صحبت“ کي ڇڏيو ڀٽڪائي تو،
رهبري تنهنجي بلي ڇاڇا ڪيم.