جُدا ٿيندي اکين ۾ ڪو وفا جو گيت گُنجي ٿو،
ڪو سُڏڪن جي سُرن تي ڄڻ هوا جو گيت گونجي ٿو.
اهو ڪئن عشق ۾ ڳائي، سگهي ٿو گيت نوڙت جو!
جنهين جي جِيءَ ۾ هردم انا جو گيت گونجي ٿو.
اها برسات ڏس! ڪي پل، اکيون کولي عبادت مان،
اُٺي جي هِن هوا ۾ ڪو، خدا جو گيت گونجي ٿو.
پراڻي پيار جا سارا، وڃن ٿا گهاءَ تازا ٿي،
جدائيءَ جي ڏکن جو جئن، لتا جو گيت گونجي ٿو.
ائين مايوس ڇو آهين؟ ڪري ڪجهه غور ٿو ڀي ٻڌ!
اَڃا آزادگيءَ جي ڄڻ، صدا جو گيت گونجي ٿو.
****