مذهب

قرآن اوهان کي ڇا ٿو چوي؟

هي ڪتاب قرآن حڪيم جي بنيادي تعليم ۽ پيغام کي سمجهائيندڙ سولي سنڌي ۾ بيحد اهم مواد تي آڌاريل آهي جيڪو اميد آهي ته سنڌي ٻوليءَ جي پڙهندڙن لاءِ قرآني ڄاڻ ۽ حڪمت جو ڀنڊار ثابت ٿيندو. اسان سمجهون ٿا ته قرآن مجيد جي حوالي سان ٿيندڙ ههڙين موچارين ڪوششن کان عام ماڻهن توڻي طالب علمن کي بهره ور ڪرڻ هن دور جي بيحد اهم ضرورت آهي. ان ڪري هي ڪتاب تڏهن وڌيڪ نتيجا ڏيندڙ ثابت ٿيندو جڏهن هن کي وڌ ۾ وڌ ڦهلايو وڃي ۽ خاص ڪري تعليمي ادارن ۾ تعليمي مقصدن لاءِ هن مان استفادو ڪيو وڃي.
Title Cover of book قرآن اوهان کي ڇا ٿو چوي؟

قرآن جو ٻيو معجزو ان جا علم ۽ معارف آهن

قرآن جو ٻيو معجزو ان جا اهي بي شمار علم ۽ معارف ۽ حقيقتون ۽ اسرار آهن جيڪي ان ڪتاب ۾ ڦهليل آهن ۽ جن مان هر هڪ جدا جدا مستقل معجزو آهي. انسان جو علم جيترو وڌيڪ ترقي ڪندو ۽ ان جي اکين مان جيترو وڌيڪ پردو کڄندو، قرآن جو جمال ان کي اوترو وڌيڪ نظر ايندو.
انساني فهم ۽ فراصت جون حدون انتهائي تنگ ۽ محدود آهن، اهي قرآن جي وسعتن جو احاطو ڪري نٿيون سگهن، تنهن ڪري قرآني فهميءَ جو جيڪو حصو ملي اهو غنيمت آهي.
اَنۡزَلَ مِنَ السَّمَآءِ مَآءً فَسَالَتْ اَوْدِیَۃٌۢ بِقَدَرِہَا (الرعد : 17)
ان آسمان مان پاڻي وسايو پوءِ پنهنجي قدر آهر واهه وهيا.
انهن معجزن ۾ اعجاز جا ڪيترائي پهلو آهن، انهن مان هڪ پهلو قرآني حقيقتن جي ابديت ۽ قطعيت آهي، حقيقت ۾ اها ابديت ۽ قطعيت الاهي علم ۽ الهي ڪلام جو خاصو آهي تغير ۽ اشتباهه انساني علم ۽ انساني معلومات جي لوازمات مان آهن. چونڪ قرآن مجيد پوري طرح محفوظ آهي تنهن ڪري ان جي حقيقتن جي ابديت ۽ قطعيت ۾ ڪو فرق ناهين پيو.