لفظن جو جادوگر
ريڊئي جي دنيا ته آهي ئي آواز جي دنيا جنهن ۾ چلڪڻا چهرا هجن يا نه پر آواز ضرور ڇلڪڻو هوندو آهي ۽ آواز کي ڪنهن گيٽ اپ جي ضرورت نه هوندي آهي، ڪنن کي اکيون بڻائي ريڊيو آواز رستي سڀ ڪجهه ڏيکاري ڇڏيندو آهي ۽ آواز وري جڏهن ڪمپيئر نواز سومري جو هجي ته پوءِ نه رڳو ڪن ٺري پوندا آهن پر سڄو جسم سڀ حواس راحت جي سرهاڻ ۾ واسجي ويندا آهن، مٺڙي ۽ سريلي آواز جو مالڪ نواز سومرو ڪنهن به تعارف ۽ واکاڻ جو محتاج نه آهي، پهرين ملاقات ۾ پنهنجو ٿي وڃڻ وارو هي همراهه جادو ڀرئي آواز سان دوستي جي سڀني اکرن کي ڄاڻي ۽ سڃاڻي، وري مٿان ”تارن ڀري رات“ هجي، هئو مئو ٽريل، لوڪ ننڊاکن نيڻن سان ڪراچي ريڊيو جي اسٽوڊيوز مان صوبائي رابطي تي اڀرندڙ نواز جو آواز يقينن هزارين دلين جي ڌڙڪن بڻجندو هوندو ۽ نواز جي هن ڪتاب جو نانءُ به تارن ڀري رات پروگرام وارو رکيل آهي، جنهن ۾ نواز سومرو پنهنجي دور جي ماحول ۽ معاشري کي دل جي سچائي سان لفظن رستي رات جي ننڊاکي پهر ۾ جيترو نوازي سگهيو نوازيو اٿس، جيڪو پورهيو، يقينن ساراهڻ لائق آهي، ڀلي ڳالهه وري اها جو نواز ان پورهئي کي سانڍي رکيو ۽ هميشه امر ڪرڻ لاءِ ڪتابي ويس پهرايو آهي، جيڪو ادب جي دنيا ۾ ضرور پنهنجي جاءِ والاريندو، حالانڪه هڪ ڪمپيئر جي حيثيت ۾ تارن ڀري رات ۾ مون به ڪيترائي پروگرام ڪيا پر سنڀالجي نه سگهيا ۽ ان معاملي ۾ نواز گوءِ کڻي ويو، نواز جس هجئي.
ڊسڪ جو ڪي ٽائيپ لکيل اسڪرپٽ جا ننڍا ننڍا ٽڪرا جيڪي حقيقت ۾ ٻڌندڙن جي دلين جو آواز آهن، مون پڙهيا آهن پر مان تبصرو نٿو ڪيان اوهان خود فيصلو ڪندا ته نواز ڪيئن نه سادي ٻولي ۾ سولائي سان هر عنوان کي لفظن رستي سينگاريو ۽ نڀايو آهي.
ڳالهه ڪبي نواز سومري جي، جنهن سان منهنجي ملاقات ڪراچي ۾ ئي ٿي، ملڻ سان ائين لڳو ڄڻ هڪڙي مزاج جا هجون، ريڊيو ڪراچي تي نوجوانن ۽ شاگردن جي پروگرام بزم طلبا کان وٺي جنرل پروگرامن تائين نواز ۽ مان ڄڻ جسم هڪ جان رهيا آهيون، ڇو ته نواز جو مزاج ۽ طبيعت من موهڻ واري آهي، هو يارن جو يار، دوستن جو دوست ۽ ڀلوڙ انسان آهي، نواز ۽ مون ڪيترائي پروگرام گڏ به ڪيا آهن، خاص ڪري اسان جو مقبول سلسلو هيو، مامو مکڻ، جنهن ۾ ٻڌندڙ مزاحيه سوال پڇندا هئا جيڪي مان پڙهندو هئس، جنهن جا جواب هڪ مخصوص انداز ۽ آواز ۾، مامي مکڻ جي ڪردار ۾ نواز ڏيندو هو، اهو سلسلو ڏاڍو مقبول رهيو، اسان سان گڏ انائونسر ڪلثوم قاضي به هوندي هئي.
بهرحال نواز ريڊيو ڪراچي تي سنڌي پروگرامن جي هڪ سڃاڻپ رهيو آهي، رڳو تارن ڀري رات نه پر شعر ۽ نغمه جهڙي نموني نواز ڪيو، شايد ئي ٻيو ڪو ڪري سگهي، مٺڙي آواز ۽ محبتي طبيعت رکندڙ نواز سومرو پروگرامن تي سچائي سان محنت ڪئي آهي، بلڪل پروگرام ۾ گم ٿي سمائجي ويندو آهي، مون کي يقين آهي ته نواز جو هي قلمي پورهيو يقينن پڙهندڙن ۾ ٻڌندڙن وانگر جاءِ پيدا ڪندو.
اسان جو مانوارو سائين ڀلوڙ براڊ ڪاسٽر نثار ميمڻ چوندو آهي، ريڊيو وارن کي ٻڌو ڀلي پر ڏسڻ جي خواهش نه رکو، ڪٿي ائين نه ٿئي جو ٻڌڻ وارو آواز جو خاڪو ڏسڻ واري تصوير جهڙو نه هجي ۽ اوهان جي خوابن جي محلات پٽ اچي پوي پر يقين ڪريو نواز سومرو سان اها ڳالهه فٽ ٿي اچي، نواز جو جهڙو خوبصورت آواز آهي، اهڙو ئي هو خود به سهڻو من مهڻو، من موهيندڙ آهي، ان لاءِ پڪ سان اوهان جي خوابن جو محلات نه ڊهندو، اهڙو ئي هي گڏ ڪيل نواز جو ريڊيائي اسڪرپٽ وارو ڪتاب تارن ڀري رات آهي، اسان جون دعائون نواز سان گڏ آهن، اڃا به ڪاميابيون نواز جي انتظار ۾ آهن، ساٿ سلامت، سڪ سلامت
سڪندر سرواڻ
ڪمپيئر، ريڊيو پاڪستان ڪراچي