روز تنهنجون ڪن پڇائون سانوري او بانوري!
ڄام شوري جون هوائون، سانوري او بانوري!
شام پرکيون، رات ڄاتيون تون نٿي سمجهين سگهين،
هي اکين جون التجائون سانوري او بانوري!
خواب پگهريا پئي اکين مان نير جي صورت جڏهن،
سي هيون منهنجون وفائون، سانوري او بانوري!
هِن جنم ۽ هُن جنم ۾ تون ئي مون سان گڏ هجين،
شال اگهجن هي دعائون، سانوري او بانوري!
سانوڻين ۾ سار کي روڪيون ته آخر ڪيئن ڀلا!
خيال ۾ تنهنجون ادائون، سانوري او بانوري!
تو بنا ٿيون جيءَ جهورن موسمون ’آڪاش‘ سڀ،
ٻوجهه آهن هي فضائون، سانوري او بانوري!