شاعري

هينئڙي منجهه هڳاءُ

هي ڪتاب ”هينئڙي منجهه هڳاءُ“ نئين ٽهيءَ جي خوبصورت شاعر مخمور رضا جي شاعريءَ جو پهريون مجموعو آهي. سائل پيرزادو لکي ٿو ”مخمور جي شاعريءَ جي آرسي به پنهنجي دور جي درد جا ڪيئي عڪس سانڍيون بيٺي آهي. مخمور جي شاعراڻي نگاهه ڏاڍي حُسناڪ آهي، هن وٽ شئن کي ڏسڻ، ۽ بيان ڪرڻ جو هڪ پنهنجو انداز آهي، جيڪو هن پنهنجي ننڍڙي شاعراڻي ڄمار ۾ حاصل ڪري ورتو آهي، اهو شايد هن جي جنون جو معجزو آهي.“
  • 4.5/5.0
  • 5436
  • 776
  • آخري ڀيرو اپڊيٽ ٿيو:
  • مخمور رضا
  • ڇاپو پھريون
Title Cover of book هينئڙي منجهه هڳاءُ

اداري پاران

مهين جي دڙي جي مٽي لافاني قدرن واري تهذيب آهي، جنهن کي دنيا جي عالمن، اديبن، شاعرن ۽ سياحن سجدا ڪيا آهن. دنيا جي عظيم تهذيب جي پرورش هن مٽيءَ جو ڪرشمو آهي. لاڙڪاڻو پنهنجي شاعراڻي واسَ وَنَ سان سڄي سنڌ ۾ سڃاتو ويندو آهي. جديد سنڌي شاعري پنهنجو معراج ماڻيو آهي، سنڌي شاعري ۾ سڳداسي شاعريءَ جهڙو هڳاءُ بخشيندڙ ڪشنچند بيوس، شيخ اياز ۽ نئين ٽهي جديد سنڌي شاعريءَ کي جوڀن بخشيو آهي.
مخمور رضا غزل جي اڻانگي صنف ۾ پنهنجي ڪوتا جا ڪل رنگ ڀريا آهن. هو جديد سنڌي شاعريءَ ۾ پنهنجي ٽهيءَ جو سگهارو ۽ نرالو ڪوي آهي، هن جو غزل فن جي حسناڪين سان مخمور آهي، فڪري طرح مخمور رضا پختو ۽ سڀاءُ وارو شاعر آهي. جماليات جو اظهار ڀرپور انداز سان ڪرڻ جي طاقت رکي ٿو.
سنڌي شاعريءَ ۾ غزل جا ايترا رنگ نکريا آهن، جنهن لاءِ چئي سگهجي ٿو ته ڏات جي هٿ تي مينديءَ رتا غزل سرجندا رهيا آهن، شاعري حسناڪين جا سمورا پنڌ ڪري چڪي آهي، اندر جي سنهين ڳلين کان گذرندي زندگيءَ جهڙو ساءُ ۽ ويساهه بخشي ٿي. شاعري ساهه جي تار آهي ۽ پرينءَ جي گفتار آهي. جنهن جي مهڪ مخمور رضا جي هن ڪتاب ۾ موجود غزلن مان به محسوس ٿئي ٿي.
سمبارا پبليڪيشن حيدرآباد پاران سنڌي ادب کي سينيئر اديبن جي ڪتابي اشاعت سميت نوجوان شاعرن، اديبن ۽ ليکڪن کي به وقت به وقت پذيرائي ڏيڻ جي مشق کي جاري رکندي لاڙڪاڻي جي هن نوجوان ڪوي مخمور رضا جي پهرين شعري مجموعي ”هينئڙي منجهه هڳاءُ“ ڇپرائي نهايت سرهائي محسوس ڪئي پئي وڃي، اميد ته هميشه جيان ساڳي موٽ ملندي.

ساجد سنڌي
سمبارا پبليڪيشن حيدرآباد
03003513966