شاعري

ڪئمپس ڪَجراريون

هي ڪتاب ”ڪئمپس ڪجراريون“ خوبصورت شاعر بابر جاگيراڻيءَ جي غزلن جو مجموعو آهي. بابر جاگيراڻي شاعريءَ سان لئون نڀائيندي شاعريءَ جي جهول ۾ پنهنجي زندگي جي جذبن، احساسن، خيال، اُمنگن، ٽهڪن، لڙڪن، دوستن، محبوبائن جا عڪس ڪويتا جي ڪئينواس تي چِٽڻ ۾ ڪامياب نظر اچي ٿو.
Title Cover of book ڪئمپس ڪَجراريون

توکي ماڻي سگهيو نه آهيان مان،

توکي ماڻي سگهيو نه آهيان مان،
ڪجهه به ڄاڻي سگهيو نه آهيان مان.

ڪيئن تو وٽ الائي رهجي وئي،
دل کي آڻي سگهيو نه آهيان مان.

وار تي وار جو ڪيا پنهنجن،
سي سُڃاڻي سگهيو نه آهيان مان.

دل ڇِڳل کَٽَ جيان ڇِڳي آهي،
تنهن کي واڻي سگهيو نه آهيان مان.

جهول ۾ خار، ها نه ئي ڪي گل،
جي اُماڻي سگهيو نه آهيان مان.

روز مليو، مليو نه پر مَن سان!
سو ته ڄاڻي سگهيو نه آهيان مان.
***