جي به دردَن جُون ساعَتون آهن
عشقَ تُنهنجون عنايتون آهن.
روبَرو دوستيءَ جون دعوائون
دِل ۾ ڪيڏيون رَقابَتون آهن.
شُهرَتُن جو سَهارو چاهين ٿو
عارضي سي به اڏاوَتون آهن.
تُنهنجي نظرُن مان جي ڪِري پَياسين
جاتَي ڪاٿَي مَلامتُون آهن.
ٽهڪ ميلا ۽ هي وڇوڙا ئي
زندگيءَ جُون عَلامَتون آهن.
علم وارن جا ادبي ميڙَن ۾
مسخَرن جون صَدارتُون آهن.
ڪا خبر ناهي ته ڪِٿي آهين
تُنهنجون خُوابن ۾ زيارتون آهن.
هاري مزدور جا ڪيل پورهيا
ديس! تنهنجون عبادتُون آهن.