پرين هاڻ توکي ڀلائڻ ڏکيو آ،
چٽيل نقش دل تان مٽائڻ ڏکيو آ.
ڇڏيو چاهتن ۾ مون سڀ ڪجهه لُٽائي،
سُکيو جيءُ توڙي جلائڻ ڏکيو آ.
رڳو لڙڪ، سڏڪا ڏئي پئي جيڪا،
انهيءَ زندگيءَ سان نڀائڻ ڏکيو آ.
اڪيلائي پاڇي جيان مون سان شامل،
اداسيءَ کان دل کي بچائڻ ڏکيو آ.
وئين تون ته چوڦيرٿي رُڃ ڀانيان،
سوا تنهنجي گهر کي سجائڻ ڏکيو آ.
اهو شخص جيڪو خوشيون ڏئي هميشه،
انهيءَ شخص جو مَنُ رنجائڻ ڏکيو آ.
ويو راز ڄاڻي، آ جيڪو زمانو،
اهو راز توکان لڪائڻ ڏکيو آ.