شاعري

اُماس راتيون، اُداس رستا

هي ڪتاب ”اُماس راتيون، اُداس رستا“ شاعره فهميده شرف بلوچ جي شاعريءَ جو پهريون مجموعو آهي. ساجد سنڌي لکي ٿو: ”فهميده شرف جي شاعري ۾ داخلي ڪيفيتن جي اپٽارڄڻ ته ٿڪاوٽ سان چور، بند گهٽيءَ ۾ ڦاٿل مسافر جهڙي ئي لڳي ٿي، پرفهميده شاعريءَ ۾ پنهنجي پناهگاهه جوڙي درد، هجر۽ اوسيئڙي جو اهڙو ته جهان جوڙيو آهي جو ڄڻ ته هن سٽ سٽ ۾ پنهنجي سريرجو سڳو پوئي ڀوڳنائن سان اڻٽٽ رشتو جوڙيو هجي.“
Title Cover of book اُماس راتيون، اُداس رستا

جُهومي ڳائي من،

جُهومي ڳائي من،
ڪاش اچي ساجن

جيسين منهنجي جيون ۾،
ترسيل آ جوڀن
ڪاش اچي ساجن

گهر آڳر جي ٽالهيءَ جو،
جهولي چئي پن پن
ڪاش اچي ساجن

سانوڻ رت جي برکا جيئن،
هت به وسي پل کن
ڪاش اچي ساجن

خوشبو، رنگ پکيڙڻ لئه،
گيت لکي وٺجن
ڪاش اچي ساجن

روز هوائن ۾ وکري،
سپنا ٿا سڏڪن
ڪاش اچي ساجن
ڪاش اچي ساجن