شاعري

اُماس راتيون، اُداس رستا

هي ڪتاب ”اُماس راتيون، اُداس رستا“ شاعره فهميده شرف بلوچ جي شاعريءَ جو پهريون مجموعو آهي. ساجد سنڌي لکي ٿو: ”فهميده شرف جي شاعري ۾ داخلي ڪيفيتن جي اپٽارڄڻ ته ٿڪاوٽ سان چور، بند گهٽيءَ ۾ ڦاٿل مسافر جهڙي ئي لڳي ٿي، پرفهميده شاعريءَ ۾ پنهنجي پناهگاهه جوڙي درد، هجر۽ اوسيئڙي جو اهڙو ته جهان جوڙيو آهي جو ڄڻ ته هن سٽ سٽ ۾ پنهنجي سريرجو سڳو پوئي ڀوڳنائن سان اڻٽٽ رشتو جوڙيو هجي.“
Title Cover of book اُماس راتيون، اُداس رستا

جيڪر زهر پيان،

جيڪر زهر پيان،
ڪنهن جي لاءِ جيئان
جيڏيون! هن سنسار ۾.

ساجن سوا هيکلي،
هاڻي ڪيئن ڪيان؟
جيڏيون! هن سنسار ۾

سورن ساڙيو ساهه کي،
ڀڙڪي باهه جيان
جيڏيون! هن سنسار ۾

سامهون سُڃَ ڏسان پئي،
ڪنهن کي سڏ ڪيان
جيڏيون! هن سنسار ۾

جتي هوت ڇڏي ويو،
اتان ڪو نه هٽان،
جيڏيون! هن سنسار ۾

هڪڙو ڀيرو شل وري،
پنهل ساڻ مِلان
جيڏيون! هن سنسار ۾
جيڏيون! هن سنسار ۾