ٿيڻا ڪٿي ته ٿي به ويا، ڪي ڪم نه ٿي نه ٿيا،
خوشيون به ٿي نه ٿيون، ڪٿي ڪي غم نه ٿي نه ٿيا.
هن امتحانِ عشق ۾ عالي جناب ايئن،
ڪي کيت ٿي نه ٿيا ڪٿي، ڪي ڏم نه ٿي نه ٿيا.
سچ جي به ساک پرک جا، ساکي ۽ پارکو،
سگهيا عدم نه ٿي ڪٿي، ابهم نه ٿي نه ٿيا.
دل کان ۽ دل جي درد کان، بي درد بي خبر،
همدرد ٿي نه ٿيا ڪٿي، همدم نه ٿي نه ٿيا.
بي جرم بي خطا به ڪي مجرم قرارُ پر،
باجرم، باخطا به ڪي مجرم نه ٿي نه ٿيا.
اندر جا هوُ ٻيا ته هوُ ٻاهر جا ڪجھه ٻيا،
هن دؤر ۾ ڀي درهم و برهم نه ٿي نه ٿيا.
پرچڻ، رسڻ ته پيار ۾ ٿيندو به آ مگر،
پرچڻ رسڻ جا پيار ۾ پرچم نه ٿي نه ٿيا.
ويراڳ راڳ آ، وڏو ويراڳ راڳ ۾،
سرگم نه ٿي ٿيا اُتي، سِر گُم نه ٿي نه ٿيا.
درشن سواءِ يار جي حاذق حڪيم خود،
گھُورن جي زخم گھاوَ جي مرهم نه ٿي نه ٿيا.
پرديسي پنهنجي اُن پرينءَ، آڏو آ سِرُ به خم،
باقي هجن به سوَ ڪٿي، سرخم نه ٿي نه ٿيا.