جيئن دل لڳي جا سهڻا سودا نه ٿي نه ٿيا،
تيئن اک لڳي جا ساڀيان سپنا نه ٿي نه ٿيا.
جت آهي دل لڳي ڀڳي، اُت اک به ڇا لڳي،
دل جا ۽ اهڙي ديد جا درجا نه ٿي نه ٿيا.
ورجائڻا هئا به جي الفاظ پيار جا،
گويا اُهي به گوهري گفتا نه ٿي نه ٿيا.
ڪرڻا هيا ڪيا به مون ڪنهن پر جُهڪي مگر،
سِڪ جا ۽ سونهن جا اهي سجدا نه ٿي نه ٿيا.
دل ۾ ويا ته رهجي ظاهر نه ٿيا ڪڏهن،
ارمان پنهنجي دل سندا پورا نه ٿي نه ٿيا.
لاڙيندي لڙڪ نيڻ سندم خُشڪ ٿي ويا،
منهنجا ته نيڻ خُشڪ هي آلا نه ٿي نه ٿيا.
مولا بغير طلب ۽ طالب به ڇا سليم،
طالب اُهي ئي طالب مولا نه ٿي نه ٿيا.