مُلاقات
ڏسندي هڪ ٻئي کي، ڇرڪياسين.
’’ڪيئن آهيو‘‘ ۽ ’’ڪاٿي آهيو‘‘؟
’’هيڏو عرصو ڪيئن گذاريوَ؟‘‘
ڪيڏا سطحي سوال پڇياسين _
هن جي چيچ سان سهڻو ننڍڙو،
مون سان گڏ هئي منهنجي گڏڙي _
هوڏانهن منهنجو “صاحب” آهي،
۽ هن پاسي هوءَ منهنجي “مسز” آ
“ اڄ ڪلهه ڪهڙي مصروفيت آ”
شعر اڃا ڀي لکندا آهيو؟
هُن جي سَوَلن سوالن جو ڀي،
مون وٽ ڄڻ ته جواب نه هو ڪو،
اکيون کڻي هڪ ٻئي ڏانهن ڏٺوسين،
ايئن جواب سڀئي پڙهياسين،
۽ پوءِ هي ٻاتا ٻول ٻُڌاسين،
اَمي ! انڪل روئي ڇو ٿو؟
اَبو! آنٽي روئي ڇو ٿي؟”
ويهن ورهين بعد ملياسين !!