شاعري

ڏهر منجهه ڏيئا (ڀاڱو پهريون)

هي ڪتاب ”ڏهر منجهه ڏيئا“ سيتاروڊ جي 17 شاعرن بشير سيتائي ، پيرل پرديسي سيتائي ، قادر بخش قلندر ، مجبور ميمڻ سيتائي، محمد بچل بيوس، سقراط سيتائي، مسرور سيتائي، سليم ، دلشاد بلوچ ، وسيم آڪاش سيتائي، اصغر سيتائي ، سڄڻ سيتائي ، گهائل غلام مصطفي ، شاڪر عزيز سيتائي، عزيز سيتائي ، منظور سيتائي ، ۽ ذاڪر سيتائي جي شاعريءَ جو گڏيل مجموعو آهي جنهن جو مرتب وسيم آڪاش سيتائي صاحب آهي.
Title Cover of book ڏهر منجهه ڏيئا (ڀاڱو پهريون)

گيت

آهين جي تون ته ناهي،
ناهين جي تون ته آهي_
هي درد منهنجي دل جو، ڇا ٿو الائي چاهي.

چاهت جون چاڙهيون چڙهندي،
مون کي ٿو هيٺ لاهي_
هي درد منهنجي دل جو، ڇا ٿو الائي چاهي.

ٻُڌُ! دوستيءَ جي پٺيان،
منهنجو مفاد ڇاهي_
هي درد منهنجي دل جو، ڇا ٿو الائي چاهي.

سو پڻ آ گهر جو ڀاتي،
جو گهر تي آيو ڪاهي_
هي درد منهنجي دل جو، ڇا ٿو الائي چاهي.

ڪو پيار پيو ٿو پالي،
ڪا سونهن پئي ٿي ساهي_
هي درد منهنجي دل جو، ڇا ٿو الائي چاهي.

هي دوست جو چوڻ آ،
هو ڏس ڏنو هو ڏاهي_
هي درد منهنجي دل جو، ڇا ٿو الائي چاهي.

جنهن ڪو جيئڻ مرڻ جو،
رستو ڇڏيو ئي ناهي_
هي درد منهنجي دل جو، ڇا ٿو الائي چاهي.

دل کي ٿو داد ڏئي ۽،
ٿو سهپ کي ساراهي_
هي درد منهنجي دل جو، ڇا ٿو الائي چاهي.