دردَ لڳا دل وارن جھڙا،
چينَ، سُڪونَ، قرارن جھڙا.
ڪاغذ جي ڪنھن ھِرک چُنيءَ تي،
سِبيا شعر ستارن جھڙا.
نيرا، گھرا نيڻَ پرينءَ جا،
ڪينجهرَ ڍنڍَ ڪنارن جھڙا.
شاھَ! رسالي تنھنجي جا سُرَ،
آھن ٽيھَ سپارن جھڙا.
خواب مُلائم مينھَن-وساڙا،
نيڻَ اناڙي ٻارن جھڙا.
وِلھَ ۾ وھنتل اُجرا منظر،
نرمل نيڻَ-نِھارن جھڙا.
لفظَ جَڙي ٿو شاعر پُوئي،
گيتَ گُلن جي ھارن جھڙا.
مُنڪر سنڌ جي آزاديءَ جا،
ماڻھُو ٽُوھَ ڪَسارن جھڙا.
ھُن جون يادون، ھُن جا سپنا،
چانڊوڪيءَ جي چارن جھڙا.