تو وٽ موٽي ايندس
شام جهڙالي،
واھُوندي جو ٿڌڙو،
ويسُ ڍَڪي وَرَندي،
تو وٽ موٽي ايندس_
جڏھن بہ سانوڻَ جَي،
وسڪاري کانپو سَرتي!
ٿر جي سونَ سَريکيءَ ،
واريءَ تي ڪا،
ستَ-رنگي جي،
اِنڊلٺ اُڀري ايندي،
تو وٽ موٽي ايندس_
جڏھن بہ بهار مُند ۾ ،
ڀيڄ ڀنيءَ جو،
ماڪَ پَوڻَ سان گُل ٽِڙندا،
تو وٽ موٽي ايندس_
جڏھن بہ نمَ جي لامَ مٿي،
گيت مِٺو ڪا ڪوئِل،
ڪُوڪي چَوندي،
ڄيٺَ ڄَراٺيءَ رُت ۾ ،
مينھَن ڪندا مانڊاڻ،
مورَ ٽھوڪي نچندا،
تو وٽ موٽي ايندس_
جڏھن بہ آڌيءَ جو،
واٽھڙو ڪو ويندي،
گيت وڇوڙي جو ڳائيندو،
يا ڪا باکَ ڦُٽيءَ جو،
پاڻياري تَڙَ تان،
ساجن پنھنجو ساري،
ٻَھلڙي سان وَرَندي،
پڪ ڄاڻ پرين! تون سان،
پريت وَنڊڻ جي لئي،
۽ نينھُن.ڳنڍڻ جي لئي،
تو وٽ موٽي ايندس،
تو وٽ موٽي ايندس_!!!