فَردِ- جُرم
خطائون ڪري، جفائون ڪري،
۽ اُتم ذاتي اَنائون ڪري،
سو ھِن سنڌ مَنجهان ڪونھي-
جو ڏينھنَ ريٽي راتيون ڪري،
وطن سان ويساھُ گهاتيون ڪري،
قومَ مان قبيلا، ذاتيون ڪري،
سو ھِن سنڌ منجهان ڪونھي-
جو چانڊوڪيون چيٽَ وِڪَڻي،
چيڪي مِٽي ۽ ميٽَ وِڪَڻي،
کارڪُن سَندا کيٽَ وِڪَڻي،
سو ھِن سنڌ منجهان ڪونھي-
جو ٻيَن جو ٻانھُن-ٻيلي ٿيئي،
سامراجي سَھيلي ٿيئي،
ڀُونءِ جو مگر ڀيلي ٿيئي،
سو ھِن سنڌ منجهان ڪونھي-
جو سونَ تي سيڻَ مَٽيندو وَتي،
جهرلوئن جو جوتا چَٽيندو وَتي،
پو ءِ بہ شَھپر وٽيندو وَتي،
سو ھِن سنڌ منجهان ڪونھي-
جو قيد مزدور، ھاري ڪري،
قتل ڪارو، ڪاري ڪري،
۽ اُجارا داري ڪري،
سو ھِن سنڌ منجهان ڪونھي-
جو غيرن جي غلامي ڪري،
سَجدا ڪري، سلامي ڪري،
ساڻن ھم - ڪلامي ڪري،
سو ھِن سنڌ منجهان ڪونھي-
جو زَرَ تي ضميرُ وِڪَڻي،
گُر وِڪَڻي، پيرُ وِڪَڻي،
امڙ جو اڇو کيرُ وِڪَڻي،
سو ھِن سنڌ منجهان ڪونھي-
جو ووٽن جو واپار ڪري،
ڪوڙ فريب، مَڪار ڪري،
آجپي کان انڪار ڪري،
سو ھِن سنڌ منجهان ڪونھي-
جو جُوءِ وِڪَڻي، جِند وِڪَڻي،
سياست خاطر سنڌ وِڪَڻي،
۽ ھيمونءَ واري ھنڌ وِڪَڻي،
سو ھِن سنڌ منجهان ڪونھي-
ھر حڪومت جي حمايت ڪري،
رڳو حاصل رعايت ڪري،
۽ نِڪمايون نِھايت ڪري،
سو ھِن سنڌ منجهان ڪونھي-
جو خواب، خُوشبو خُون ڪري،
مُرڪَ مُرجهائي مَدفُون ڪري،
۽ جيوَنُ مھينو جُون ڪري،
سو ھِن سنڌ منجهان ڪونھي-
جو ڊيمن جو ڊرامون ڪري،
روز نازل نماشامون ڪري،
۽ ڌرتي ٽامون ڪري،
سو ھِن سنڌ منجهان ڪونھي-
جو زندگيءَ کي ذليل ڪري،
اَگهي ڪري، عليل ڪري،
۽ دل جو ردُ دليل ڪري،
سو ھِن سنڌ منجهان ڪونھي-
جو آسَرا، اُميدون اُجاڙي،
دلاسا ۽ ديدون اُجاڙي،
اکين جون عيدون اُجاڙي،
سو ھِن سنڌ منجهان ڪونھي-
جو نياڻيون ننگَ نيلام ڪري،
روشنيءَ جارنگَ نيلام ڪري،
چاھ جا چنگ نيلام ڪري،
سو ھِن سنڌ منجهان ڪونھي-
جو لَھَ-وِچڙ ۽ لِيا روڪي،
پاڻيارين جا پِيا روڪي،
۽ ڏات جا ڏيئا روڪي،
سو ھِن سنڌ منجهان ڪونھي-
جو اَمُن-آشتيءَ جو ويري آ،
پاٿاريدار آھي يا پيري آ،
۽ ڪندو ھيرا ڦيري آ،
سو ھِن سنڌ منجهان ڪونھي-
جو وحشي وڏيرو آھي،
صفا لُوسي لٽيرو آھي،
۽ بَديءَ جو بَسيرو آھي،
سو ھِن سنڌ منجهان ڪونھي-
جو ھيڻن لئي ھٿيار خريدي،
انساني اغيار خريدي،
۽ ا تيا چار خريدي،
سو ھِن سنڌ منجهان ڪونھي-
جو ھِن فَردِ-جُرم ھيٺ اچي،
سياستڪار اچي يا سيٺ اچي،
پر نَڪُ وڍائي نيٺ اچي،
سو ھِن سنڌ منجهان ڪونھي-