جهونگار جن جي جستجو ۽ سوڀ جن جي ساهيڙي
جهونگار جن جي جستجو ۽ سوڀ جن جي ساهيڙي،
ثابت ٻڌن جي سندرا، سي مرحلا پيدا ڪي ڪر.
برپٽ بکون توڙي اڃون، ونگو نه جن جو وار ڪن،
نيزن مٿي جيڪي نچن سي، نينگرا پيدا ڪي ڪر.
ها اٿڪون جن جون اجهل، گهيڙان گهڙڻ جي گت نه جن،
هر هنڌ تان ٿئي “هٽ پري” سي هوڪرا پيدا ڪي ڪر.
هي موملون هي مينڌرا، پنهنجي مرڻ جيئڻ جي لئه،
سڀ وڏڦڙا واچوڙ ويرون، وهڪرا پيدا ڪي ڪر.
هر چوڪ تي چاري چغل، چار ئي طرف چورن جي هٿ،
چنجور سان چيرڻ لئه تن کي، چلولا پيدا ڪي ڪر.
جي جيجلن جوين ۽ توڙي، جو مٿان جهيڙاند ڪن،
سي جنگ جوڌا جنگ لاءِ، جابچا پيدا ڪي ڪر.
تون پنهنجي ڏاهيءَ ڏات سان، ڏوٿين مٿان سڀ ٽار ڏک،
سانگين مٿان سک سهنج جا، سج سوجهرا پيدا ڪي ڪر.
آزاديون آباديون، آسودگيون عيدون هجن،
آسون ڪڏهن عرشن مٿي، سي آسرا پيدا ڪي ڪر.
تون سنڌڙي ساري سان گڏ، سڏجين سجاول جو به سڏ،
هر حال ۾ جي هڪ هجن، سي همنوا پيدا ڪي ڪر.