رات، مون ننڊ - چارا وڃائي ڇڏيا.
هن اکين خواب سارا وڃائي ڇڏيا.
تنهنجي شدت ۾ دل ايڏو گم ٿي وئي،
پل جوڀن جا پيارا وڃائي ڇڏيا.
ڏيک ڳوليندي تنهنجي اکين جو پرين،
زندگيءَ سڀ نظارا وڃائي ڇڏيا.
دل چڪوري سدا چنڊ جي چاهه جي،
جُستجوءَ ۾ ستارا وڃائي ڇڏيا.
زندگي رنگ جوڀن جو ماڻيو مگر،
ننڍپڻ جا سهارا وڃائي ڇڏيا.
تنهن ڪري عشق جي سير ۾ پئي ٻُڏي،
ساٿ جا دل ڪنارا وڃائي ڇڏيا.
پوءِ نظر ڪيئن ”سُندر“ اچي هي جهان،
تنهنجا، نيڻن اشارا وڃائي ڇڏيا.