3. آڌا چوُڙا، آڌا ٻورا، مال ڪوڙا، مراد پوُرا.
ڪنھن مائيءَ پنھنجي ٻانھينءَ لاءِ عاج جي ڳٽي، پنھنجي آڏو ويٺي چيرائي. چوڙيگر دستور موجب، ڳٽيءَ جا ڇوڏا لاهي پوءِ ويٺو ٻانھين چيرڻ. مائيءَ ڏٺو ته هڪ هڪ چوڙي چيرجڻ کان اڳ، ٻورو تمام گهڻو ٿو نڪري، سو چوڙيگر کي چيائين؛ ”ڏس ته هيتري ٻوري نڪرڻ ڪري ڪيترو نه عاج زيان ٿو ٿئي.“
چوڙيگر تنھن تي اهو پھاڪو چيو.
جنھن جو مطلب آهي ته عاج جي ڳٽيءَ مان، اڌ نڪري چوڙو، اڌ نڪري ٻورو، مال سڄو ڪوڙو آهي. پر پائيندڙ جي مراد پوري ٿي ٿئي.
مراد ته ٻانھين پائڻ پئسي جو زيان آهي.