جهمپير جي جواني...
جواني ڪونه ٿي آهي
اڃا ڪينجهر ڪُنواري آ
اندر مان عشق جي آڙي
هوا هرکي اُڏاري آ
گُلابي ويس ۾ ويڙهيل
اُها ئي سانجهه آ ساڳي
ڀريو سنڌور سج آهي
لهر جي ڏس ته لڱ لڱ ۾
مندر جي مورتين کي ڀي
اگر جو واس آ ويڙهيل
خيالن ۾ ته تاڙين جو
وڏو ڪو کيپ آ کيڙيل
اڃا اُن بڙّ پوڙهي جان
ٿڌي ڇانءَ درس* ۾ آهي
نه ڇڻيو آ ڪو گُل غم ٿي
حياتي سرس ۾ آهي
لمحن جي لُڙ ۾ ليٽي
کجين جي ٿُڙ ۾ ٿرجي
وصل جي واٽ کي ويڙهي
سڄي جهمپير کي ميڙي
نوان سُر ساھ سان ڇيڙي
وفا گيتن جو گهر بڻجي
چُميون هن چاھ جون ٻانهون
وري ڪينجهر ڪُنواريءَ سان
لڌيون هن لاڙ ڏِس لائون ....
†
*رسول بخش درس