جنگ جو طبل...
ڏيئو جاڳي رهيو آهي
ڌرتيءَ کان حفاظتن جا سمورا حق
وڃائجڻ لڳا آهن
محاذ تان هٽي ويل سپهه سالار
لذت جي لڱن مان مڌ جھڙا پيالا پي
جسم جي بستر تي مدهوشيون ماڻي رهيو آ
سالن کان خيمي جي در تي بيٺل سپاهي
جنگ جون سڀئي مشقون مارائي چڪو آ
ڌرتي ڌارين جي لتاڙ هيٺان
پنهنجا سمورا دنگ ڌوڙ ۾ وڃائي ويٺي آ
پر غيرتن مٿان ڪا به گار اثر ئي نٿي ڪري
۽ هڪ جهوني بُرج جي ڀر ۾ رکيل
جنگ جو جوان طبل
اڄ به وڄائيندڙ هٿن لاءِ واجهائي رهيو آهي...
†