دل چوي ٿي ته ڳائجن ڳالهيون-
ساري جڳ کي سُڻائجن ڳالهيون-
رَتُ جي رشتن رُڳو عذابَ ڏنا،
سي، ڀَلا ڪيئن ڀُلائجن ڳالهيون-
جن ڪيئي زندگيون تباهه ڪيون،
ڇو اُنهن جون لڪائجن ڳالهيون-
پيارَ ۾ نفرتون اچڻ کان اڳ،
ٺاهَه واريون ڪي ٺاهجن ڳالهيون-
پنهنجي شهرن ۾ پنهنجي ڳوٺن ۾،
ڪي ٻَڌيءَ جون ٻُڌائجن ڳالهيون-
جيئن مِٺائي ورهائبي آهي،
تيئن مِٺڙيون ورهائجن ڳالهيون-
کوڙ منزل ڏي ٿيون وڃن واٽون،
سوچ ۾ جي سمائجن ڳالهيون-
وقت مٽبو خوشيون وڌي وينديون،
جي غمن جون گهٽائجن ڳالهيون-
جيڪي، بَخشين سُڪون ڪو زاهدَ،
روح ۾ سي رهائجن ڳالهيون.