هُن جا ڪافر سوال ...!
هُن جا دهرين جھڙا سوال
مونکان هاڻ سنڀاليا نٿا ٿين
آئون جيڪو پنھنجي ڄم جي تاريخ جو پنون به
پاڻ کان وڃايو ويٺو آهيان
هوءَ جيڪا آدم جو اولاد سڏرائڻ کان پھرين
حوا جي ڌيءَ هجڻ جا دليل پڇڻ لڳندي آهي
آئون هن جي ڪافر سوالن کي آخر ڪٿي لڪايان
هوءَ جيڪا مذهبن جي روايتي رب کي
مڃڻ لاءِ تيار ئي ناهي
سندس سوال صليبن تي چاڙهي ته سگھجن ٿا
پر سندس جوابن جي اُميد کي ماري نٿو سگھجي
هوءَ مٽيءَ مان ٺھيل ماڻھو تي
دنيا جيڏو ناول لکڻ ٿي چاهي
آئون هُن جي کوجنا مان گھڻون خوفزده آهيان
ته ڪٿ هوءَ خُدا سان پھرين ملاقات ۾
ڪائنات جي وڏي هُجڻ جو ڊگھو بحث نه ڪري وجھي.!