تجربن جي تک ۾ ٻڏي ويل ماڻھو
محبت جي مم منھنجي زندگي جا گوڏا چٽي
مونکي هڪ ئي جڳاءِ تي ويھاري ڇڏيو آهي
پيار جي ڪتاب جو پھريون سبق مون توکان ئي سکيو هئو
منھنجي عمر جي اک
تنھنجي تجربن جي تاريخ کان ڪافي ننڍي هئي
آئون پنھنجي معصوم محبت کي
ڪيئن ٿي سمجھائي سگھيس ته
تجربن جي تک ۾ ماڻھو ٻانھن تائين به ٻڏي ويندو آهي
جنھن جي واپسي ضايع ٿيل زندگيءَ کانسواءِ
ٻيو ڪجھه به ناهي هوندي
سج سان اکيون ملائڻ جي عمر
آئون تو وٽ ئي وڃائي آيو آهيان
پر مون تو مان هڪ تجربن جي تاريخ هٿ ڪري ورتي آهي
جيڪا عشق جي اک کان الاهي وڏي آهي
جيڪا ماڻھو کي کائي وڃڻ جي سگھه رکي ٿي
جنھن اڳيان احساس ۽ ارادن جون اکيون انڌيون ٿي وڃن ٿيون
هاڻ مون به پنھنجا انڌا ڏينھن
واندڪائي مھل توکي ئي ڏئي ڇڏيا آهن
هاڻ آئون به تنھنجي عمر جي اک جيڏو ٿي ويو آهيان
۽ هاڻ آئون به تجربن جي تاريخ کي سھيڙڻ لڳو آهيان....