مونکي ھاڻ سمجھه ۾ آيو آهي ...
مونکي هاڻ سمجھه ۾ آيون آهن
ڀروسا جيڪي ماڻھوءَ کي ڪٿ به هلائي ٿا سگھن
آئون تنھنجي اکين ۾ هلندي
صدين تائين سفر ڪري سگھان ٿو
غم جو گولو ڀل ته ڪيڏو به وڏو ڇو ن هجي
آئون تنھنجي پيار جي پرن سان
آسمانن تائين اُڏامي سگھان ٿو
شمسي گرھ تنھنجي بدن جي بيھڪن جھڙا ته ناهن
پر آئون تنھنجي مُرڪ سان
سڄي مُحبتن جي مخلوق گڏ ڪري
دنيا مٿان حُڪمراني جو حق حاصل ڪري سگھان ٿو
سج چنڊ ۽ تارا
تنھنجي حُسن اڳيان هڪ پل به ٽڪي نٿا سگھن
تون نعمتن جي اُها ندي آهين
جنھن مان ڪيترائي سمونڊ سيرابجن ٿا
هوائن جي هٿ تي گُھمندڙ تنھنجو غرور
وڻن کي به لوڏي وجھندو آهي
تنھنجي ماپ جو معيار
محبتن جي اک سان ڪري ٿو سگھجي
زمين ۽ آسمان جيڏا سفر
مون تنھنجي ئي اکين ۾ ڪيا آهن
چنڊ تي هلڻ جو تجربو
مونکي هاڻ سمجھه ۾ اچي ويو آهي
آئون توسان گڏجي
دنيا جو ڪو به گولو گُھمي ٿو سگھان.