آئون پنھنجو پاڻ کي ڳولھي رهيو آهيان ...!
آئون وقت جي واندڪائي هٿان
اُهو مري ويل ماڻھو آهيان
جنھن جي ڪنن تائين
پنھنجي وڃائجي وڃڻ جو اطلاع به ناهي پُھچي سگھيو
منھنجا مُھانڊا
مونسان مشاهبت آخر ڇو نٿا ڏين..!؟
آئون پنھنجي زندھ هجڻ جي هڪ به نشاني
هٿ ناهيان ڪري سگھيو
ٺھڻ ۽ ڊھڻ جو سلسلو
منھنجي وجود کان آخر ڪيترو وڏو آهي...!؟
اهو سوال آئون اڪثر سمنڊ کان ڪندو آهيان
سمنڊ جنھن جو ذائقو اڃان تائين مٺو ناهي ٿي سگھيو
آئون پنھنجا آثار ڳوليندي
هڪ وڏو اثاثو ٿيندو پيو وڃان
پاڻ کي پڙهڻ جا ڏينھن اڄ مون مٿان لٿل آهن
طبقن ۾ ورهايل
زمين ۽ آسمان جا ستئي پُڙ
آئون پنھنجي مٿي تي رکي رُلي رهيو آهيان
پر آئون پاڻ کي ڳولھڻ جون ڳالھيون
ڪٿان به حاصل ناهيان ڪري سگھيو
ڪٿ آئون خود پرستيءَ ۾ اچي
خُدا ته ناهيان ٿي ويو...!؟