سعودي عرب ۾ چوري نه برابر
ڳالهه ٿا ڪن ته هڪ ڏينهن شاهه لطيف ستو پيو هو ته هڪ ڀاڄيءَ واري اچي هوڪو ڏنو. پاڻ ڇرڪ ڀري اٿيو ۽ ويٺل فقيرن کي چيائون: “ٻڌانوَ ته هن ڇا چيو؟”
““سائين هو ته ڀاڄيون وڪڻي رهيو آهي سوئا، پالڪ ۽ چڪا.”
“نه،” شاهه لطيف وراڻيو، “ستا پلڪ چڪيا.”
بهرحال اکيون پوري سمهڻ بدران ڪجهه دير جاڳڻ ڪري هاڻ هوش اچڻ لڳو ۽ چادر پري ڪري اٿي ويٺس. حسن جو هنڌ سندس ڀيڻ يا زال ويڙهي ڪنڊ ۾ رکي وئي هئي. مون اٿي بيهي چادر ۽ کيس نما اوڍڻي تهه ڪئي، ان مٿان وهاڻو ۽ ان مٿان اسپنج جو گاديلو چئوڻو ڪري ٺاهي رکيم. سعودي عرب ۾ جپانين واري هي ڳالهه مون کي وڻي ته هو گهڻو تڻو پٽ تي ويهي ماني کائين ٿا ۽ پٽ تي سمهن ٿا. ڇا جا ڳرا پلنگ ۽ کٽون ۽ ڇا جا ڊائننگ ٽيبل ۽ منگهڻن هاڻيون ڪرسيون. مهمانن لاءِ هر گهر ۾ سنها اسپنج (فوم) جا ڇهه ست گاديلا ٿين، جيڪي اسٽور روم ۾ اڀا ڪري رکن. جيترا مهمان اچن اوترا اهي گاديلا ڪڍي هر هڪ کي ڏين، جن مٿان چادر ۽ هڪ وهاڻو رکي مرد ڊرائينگ روم ۾ ۽ زالون بيڊ روم ۾ ماچيس جي تيلين وانگر قطار ۾ سمهن. انهن گاديلن جي ٿولهه ٽي انچ کن ٿئي. ڊيگهه ڇهه فٽ ۽ ويڪر ٻه فوٽ کن.
پنهنجو هنڌ پاسي تي رکي ايئرڪنڊيشنر بند ڪيم ۽ وضو ڪري گهر کان ٻاهر نڪتس. سعودي عرب ۾ لڳي ٿو ته چوري نه برابر آهي ۽ سيڪيورٽي، سيفٽي ايتري حد درجي جي آهي جو هي ته پاڪ شهر مدينو آهي، پر ينبو جهڙي بندرگاه ۾ به گهرن جا در ـ مين گيٽ کان اندرين بيڊ روم تائين ۽ اسٽور روم جا دروازا کليا پيا آهن. مهمان ته ڇا گهر جا ڀاتي به هليا ويندا آهن ته به تالي جي ضرورت ناهي. اها هڪ وڏي ڳالهه آهي، جيڪا دنيا جي شايد ئي ڪنهن ملڪ ۾ هجي. ڪو کڻي ڇا به چئي پر سعودي عرب ۾ چوري چڪاري ناهي. ڇو نه آهي ان جو سبب خدا جو خوف سمجهو يا ڏوهه جي جهٽ پٽ سخت سزا (هٿ ڪپڻ) پر ڪنهن طريقي سان Law & Order جي حالت مضبوط آهي. پوليس واري (شرطي) جي نالي سان چڱن خاصن جو ساهه ٿو وڃي. پوليس جو ڪو وڏو آفيسر ته ڇا جونئير ٽيٽيهرن جهڙا ڇوڪرا جن جو نه قد بت آهي نه رعب تاب پر پوليس جي وردي ۾ ملبوس هجڻ ڪري وڏا وڏا داداگير (هتي جا يا اسان جي ملڪ جا) انهن کان ڪن ٿا هڻن ۽ هتي شرافت جا پتلا بڻجيو هلن ٿا.
سو ڪمرو ڇڏڻ مهل ضروري ناهي ته گهر جي مالڪن کي ٻڌائجي ته آئون وڃان پيو، پٺيان منهنجو ۽ توهان جو قيمتي سامان پيو آهي ان جو خيال ڪجو يا در کي لاڪ ڪري ڇڏجو. ها اچڻ وقت در تي ڪڙو هڻڻ ان ڪري ضروري آهي ته جيئن گهر ۾ رهندڙ عورتون چڱي طرح پڙدو ڪري سگهن. ان بعد ڪاٺ جي ڦيرڻي يا ٻاهر لڙڪندڙ رسي ذريعي اندريون ڪنڍو کولي اندر اچي سگهجي ٿو.