مشهور عربي اخبارن جا مالڪ
“ اسان وٽ انگريزي اخبار نويسي لاءِ اسٽاف جي کوٽ هئي،” هشام ٻڌايو، “ پوءِ احمد محمود کي المدينه اخبار مان وٺي آياسين. يمن جي اخبار عدن ڪرونيڪل جو مشهور جرنلسٽ فاروق لقمان اچي ويو. پاڪستان مان ڪيترا اخبار نويس گهرائي ورتاسين ۽ جدي ۾ مديني روڊ تي هڪ گئراج مان هن اخبار جا پهريان پرچا ڪڍڻ شروع ڪياسين. ٽي هزار کن ڪاپيون ڇپيندا هئاسين ۽ سڀ وڪامي وينديون هيون. پوءِ الله جي فضل سان ڏسندي ئي ڏسندي اخبار جو تعداد وڌندو ويو.”
عرب نيوز جي وڪري وڌڻ بعد هنن لنڊن مان “ الشرق الاوسط” نالي عربي ۾ اخبار ڪڍي جنهن عربي اخبار کي بين الاقوامي سطح تي آندو. ان بعد عربي رسالو “ المجالہ” ۽ هڪ انگريزي رسالو Saudi Business Magzineڪڍيو. ان بعد عربي رسالو “سيدتي”، “المسلمون” ۽ “الرياضة” ۽ ٻيا ڪيترا رسالا اخبارون ڪڍيون. اهي ملڪ جي مختلف طبقن جي ماڻهن جون ضرورتون پوريون ڪن ٿا. هن وقت تائين هنن 24 رسالا ۽ اخبارون ڪڍيون آهن، جن مان 16 اڃان تائين هلندا اچن باقي اٺ بند ڪيا ويا. مديني ۾ جن جن عربن وٽ رهيس يا مليس انهن کان مٿين اخبارن جي پبلشرن جي والد جو پڇڻ تي هنن علي عبدالقادر حافظ جي ڏاڍي تعريف ڪئي ٿي. “اسان جي شهر جي ڪيترن تعليم يافته ۽ مختلف نوڪرين ۾ وڏين پوسٽن تي پهچائڻ ۾ علي ۽ هشام جي والد علي عبدالقادر جو هٿ آهي. هن نه فقط نبيءَ صلعم جي شهر مديني مان اخبار جاري ڪئي، پر ڪيترن غريب ٻارن کي تعليم ڏني. پاڻ ۽ سندس ڀاءُ عثمان گڏجي بيابانن ۾ رهندڙ بدو ٻارن جي تعليم لاءِ اسڪول کوليو ۽ تعليم وٺندڙ ٻارن ۽ انهن جي مائٽن کي پئسي جي به آڇ ڪئي، ڇو جو مائٽن ٻارن کي اسڪول ۾ ڇڏڻ کان ڪيٻايو ٿي جو سندن اٺ ۽ رڍون ڪير چاريندو. ان بعد ملڪ جي بادشاهه عبدالعزيز حڪم جاري ڪيو ته هر ٻار کي روزانو حڪومت طرفان اڌ ريال ڏنو وڃي.
علي عبدالقادر حافظ عربي ادب ۽ تاريخ جو وڏو ڄاڻو ٿي گذريو آهي. پاڻ اخبار نويس هجڻ سان گڏ شاعر پڻ هو. سندس عربي ۾ لکيل ڪتاب “ مديني جي تاريخ” تمام گهڻو مشهور آهي. اهو ڪتاب پاڻ پنهنجي حياتي ۾ آل حسن صديقي کان اڙدو ۾ ترجمو ڪرائين، جيڪو هن وقت ڇپائي هيٺ آهي. پاڻ حضور صلعم جن جي شهر مديني ۾ ڄائو ۽ ان ئي شهر ۾ 24 اپريل 1988ع تي وفات ڪيائين ۽ اتي ئي دفن ٿيل آهي.