ڊجيٽل ايڊيشن بابت
”سنڌي نثر جي صنفن جو اڀياس“ جي ڊجيٽل ايڊيشن بابت لکندي خوشي محسوس پئي ڪيان. هيءُ ڪتاب منهنجو ترتيب جي حساب سان ٻيو نمبر ڪتاب آهي جو 2005ع ۾ لکيو هئم ۽ هائر ايجوڪيشن ڪمميشن اسلا آباد جي ڊان اخبار ۾ آيل 2005ع جي اشتهار تحت HEC کي هن ڪتاب جو مسودو موڪليم جو مونوگراف اينڊ ٽيڪسٽ بڪ رائيٽنگ اسڪيم معرفت سنڌيءَ ۾ يونيورسٽين جي ليول تي منظور ٿيو ۽ 2008ع ۾ شايع ٿيو پر اداري جي پاليسيءَ مطابق هڪ سئو ڪاپيون مون کي مليون ۽ 400 ڪتاب اداري طرفان پاڪستان جي مختلف يونيورسٽيز يا ادارن ۾ ڏنا ويا ڪل 500 ڪتاب شايع ٿيا. جيئن ته هن ڪتاب جي ضرورت سڀني انهن يونيورسٽين ۾ گھڻي آهي جتي سنڌي شعبن ۾ سنڌيءَ جو مضمون ايم.اي، ايم.فل ۽ پي.ايڇ.ڊي لاءِ پڙهيو وڃي ٿو. انهيءَ ڪري هيڪ کان تحريري اجازت نامو حاصل ڪيم ۽ هن ڪتاب جو ٻيو ڇاپو روشني پبليڪيشن جي اصرار تي کين ڇپائڻ لاءِ ڏنم، هن ڪتاب جي هيڪ واري ڇاپي ۾ ڪتاب جو عنوان ”سنڌي نثر جي صنفن جو اڀياس“ هو ۽ 2015ع ۾ روشني پبليڪيشن جي ڇاپي ۾ ادا نواز گھانگھرو مون سان مشوري بعد ”ڪن“ لفظ هٽائي ڇڏيو. اهو ڇاپو موجوده وقت ڀانيان ٿي ختم ٿيڻ وارو ئي هوندو. ڪتاب جي ڪمپوزنگ 16 سال گذرڻ سبب محفوظ نه رهي سگھي جيڪو ٿورو مواد آهي ان جو به فونٽ تبديل ٿيل آهي انهيءَ ڪري هن ڪتاب کي ٻيهر ڪمپوز ڪرايو اٿم. پر ڪتاب کي جيئن جو تيئن رهڻ ڏنو ويو آهي ٻن ٽن ليکن جيئن تاريخ جي ڪتابن بابت کي نئين سر لکيو اٿم. جڏهن ”سنڌي نثر جي صنفن جو اڀياس“ ڪتاب ڪمپوز ٿي منهنجي سامهون آيو آهي تڏهن اهو خيال دل ۾ هڪدم آيو ته ڇو نه شاگردن جي ضرورت واري هن اهم ڪتاب کي ڊجيٽل ايڊيشن طور آن لائين آڻيان اهو ارادو عمل ۾ آيو آهي ۽ اڄ هيءُ ڪتاب توهان آن لائين پڙهي يا ڊائون لوڊ ڪري مستفيض ٿي رهيا آهيو. آئون ٿورائتي آهيان ڀاءُ علي رضا سهتو جي جنهن هن ڪتاب کي تمام سهڻو ڪمپوز ڪيو آهي، وڏا وڙ آهن ادا محمد سليمان وساڻ جا جو هن ڪتاب کي سنڌ سلامت جي سٿ جي ساٿ سان ڊجيٽل بُڪ طور آن لائين رکيو اٿن. سندن وڏي مهرباني جو سنڌي قوم جي علم و ادب چاهيندڙن کي گوگل سرچرز جي ذريعي دنيا جي برابريءَ ۾ آڻي رهيا آهن، هيءُ دؤر ڪمپيوٽر جو دؤر آهي انهيءَ ۾ سندن هيءَ محنت نه ڄاڻ ڪيترو سنڌي علمي ۽ ادبي خزانو دنيا کي متعارف ڪرائي رهي آهي. ڌڻي سڳورو شال کين وڌيڪ ڪاميابيون ۽ ڪامرانيون عطا ڪري جيڪي ڪتاب ۽ ٻيو مواد فقط سنڌ تائين محدود هو اڄ اهو پوريءَ دنيا ۾ سنڌي ڄاڻندڙن وٽ پهچي ٿو. هن ڪتاب جي آن لائين ڪتاب گھر ۾ شامل ٿيڻ تي سنڌ سلامت وارن جي مهرباني. (هن کان اڳ منهنجا سنڌ سلامت آن لائين ڪتاب گھر تي ڪافي ڪتاب رکيل آهن).
خيرانديش
ڊاڪٽرپروين موسى
Mob - 03332766564