ڇا جو رڙڪو هو!
پاڌر منجهه پڙاڏو هو،
هو هو هو هو هو هو هو....
دريءَ منجهان ڪو بيٺو هو،
ڪونه هو! هو! ڪونه هو! هو!
من- مهراڻ ته ماٺو هو،
رُڃ ۾ ڇاجو رڙڪو هو؟
هونءَ ته گهڻوئي ڏاهو هو،
ڪانگ ٻِه پيرو ڦاٿو هو.
رستو تي ڪو بيٺو هو،
هُو يا هُن جو پاڇو هو!
تنبوري جي تار ٽُٽي،
روح اڃا مس رِيڌو هو.
ڇاجو حق، ڇاجو انصاف،
جو ڏاڍو سو گابو هو.
سنڌڙي جو مون ساڻ هئي،
جيءَ کي ڪهڙو جوکو هو!
وشال نيلو آسمانُ،
منهنجو جيڏو سرتو هو.
تنهنجي در تي پهچائي،
اهڙو ڪهڙو رستو هو؟
اچرج جو اظهار نه ڪر،
”امداد“ اڻهئي اهڙو هو!