منهنجي خوشين جون خودڪُشيون ماتم ڪنديون رهيون،
دل ۾ سڀيئي دل-لڳيون ماتم ڪنديون رهيون.
سجدن تي؛ تنهنجي دَر اڳيان، مِٽّي ڄمي وئي،
چُپ-چاپ منهنجون بندگيون ماتم ڪنديون رهيون.
سڀ عڪس آئيني ۾ تو بنجر ڏٺا جڏهن؛
توتي ئي تنهنجون بي رخيون ماتم ڪنديون رهيون.
جنهن ڏينهن کان، ڪَمِ ظرف ڪي ساقي بڻيا هئا،
تنهن ڏينهن کان ئي ميڪشيون ماتم ڪنديون رهيون.
ڳايا ڪي اهڙا گيت ها محفل ۾ چوڙين،
هر رات ڪيئي زندگيون ماتم ڪنديون رهيون.
ننڊون کڻي ڪو، پاڻ سان پرديس ويو هليو،
بي خوابين تي دَر-دَريون ماتم ڪنديون رهيون.
دَر ٻاهران پيو بدر کي جيون سڏي، مگر-
ڪمري ۾ پنهنجون بي وَسيون ماتم ڪنديون رهيون!